महेस बस्नेतले भने माओबादीको सम्पति खोस्नु पर्छ

जेठ २४,

                                       एमाले भातृ संगठन युवा संघका अध्यक्ष महेश बस्नेतले माओवादीले भ्रष्टाचार गरी कमाएको अर्बौं रुपैयाँ राज्यले छानवीन नगरे जनताले खोस्नुपर्ने बताएका छन् । माओवादीले कमाएको अवैध पैसा खोस्ने काममा आवश्यक परे आफ्नो संगठनले जनतालाई सघाउने उनले बताए ।'देश र जनता लुटेर माओवादी नेताले अरवौं रुपैया कुम्लाएका छन्' एमाले दधिकोट गाउ कमिटीद्वारा शुक्रबार आयोजित भेलामा बस्नेतले भने-अवैध सम्पत्तिलाई राज्यले छानवीन नगरे जनताले खोस्नुपर्छ । युवा संघ त्यसमा साथ दिन तयार छ ।'

                                          सम्पत्ति शुद्धिकरणमा अख्तियार र राज्यका अरु निकायले अनुसन्धान र छानवीन गरी दोषीलाई कारवाही गर्नुपर्ने उनले बताए । माओवादीले शिविरमा जनसेनाका नाममा छुट्याइएको रकममा करोडौं हिनामिना गरेका छानवीनका लागि युवा संघले दवाव दिइसकेको पनि उनले सुनाए । हालै मात्र माथिल्लो त्रिशुली ३ आयोजनाको क्षमता बढाउने नाममा भएको चलखेलमा समेत माओवादीका नेताहरु कमिशनमा मुछिएको उनको दावी थियो । उक्त आयोजनामा मात्र झण्डै २ अर्ब रुपैया कमिशन नेताहरुको गोजीमा पुगेको सूचना आफूहरुले पाएको भन्दै बस्नेतले 'त्यो सहेर जनता नबस्ने' बताए ।

                                  अब हुने चुनावमा माओवादी पैसाको कुम्लो लिएर गाउ पस्न लागेकोले जनताले तिरस्कार गर्नुपर्ने सुझाव बस्नेतले दिए । 'चुनाव केन्दित गरेर माओवादी नेताहरु अहिलेपनि जथाभावी काम गरी सम्पत्ति थुपार्दैछन्', स्थानीय कार्यकर्तालाई सम्बोधन गर्दै उनले भने-'खबरदार अब जनता खसिबोका जस्तो किनबेचमा पर्नुहुदैन । आफूलाई अवमूल्यन गर्नेहरुलाई जनतामिली लखेट्नुपर्छ ।'

                                   माओवादीका अन्याय, अत्याचार, विकृतिविरुद्ध आफ्नो संगठन केन्द्रीत हुने समेत उनले बताए ।

नेपाल मजदूर किसान पार्टीतर्फ इंगित गर्दै अध्यक्ष बस्नेतले भक्तपुरमा 'अन्त कतै नभएको पार्टी रहेको जो गुठी जसरी सञ्चालित हुदै आएको र अलोकतान्त्रिक किसिमले जनतालाई दुख दिंदै आएको' भन्दै रोष समेत राखे । 'त्यो पार्टी (नेमकिपा)को ज्यादती पनि माओवादीको भन्दा कम छैन', उनले भने-'तर जनताको हित विपरित हिंड्ने सबै शक्ति बढारिने दिन आउंदैछ ।'